好多人話屋企家常飯最好食，因為每道餸都係心機之作。但有無諗過包裝食物都有重大意義？疫情之下，有人面對失業經濟問題；有準媽媽擔心肚中小生命嘅健康，慶幸香港有多間社企默默付出，免費派飯以解燃眉之急；又或安排陪月姨姨熬製湯水補身。努力背後，卻肩負社企自負盈虧壓力。

於是兩間社企—樂．養膳、母嬰康逸協會各推出一系列自家製真空小菜、養生湯水等，畀你買返屋企同家人分享，由一碟小菜開始用生命感染生命。

樂．養膳　派飯幫助長者、低收入人士
溫飽係生活基本，但近年好多人都面對開工不足、失業問題致三餐不繼。一直為老人院舍、基層提供營養餐送遞嘅樂．養膳，今年4月索性推出為期一年「共襄膳舉」，每日免費向更多有需要人士派飯，全年提供至少60,000個兩餸營養飯餐，只要你有需要都可以主動聯絡佢哋，以解燃眉之急。

 樂．養膳為長者、低收入家庭、有需要人士提供營養飯餐。

每年派發至少60,000個兩餸飯餐。

工作有意義　開心成為小朋友榜樣
年初加入機構嘅文職余小姐，短短半年多已好深感受：「初頭以為處理普通文書，但後來陸續收到好多查詢電話，甚至接觸多位親身上嚟拎飯嘅有需要人士，慢慢開始了解佢哋困境。所以事無大小我都會主動幫手，喺廚房幫忙舀飯裝餸甚至上陣一齊派飯。」工作量咁多，有無疲憊時候呢？佢微笑道：「雖然工作量多，但每日放工心靈都好踏實。返到屋企亦會同我嘅小朋友講日常要互相幫助，長大後回饋社會，所以我嘅工作都係一種身教嚟㗎。」

 (右) 樂．養膳文職余小姐。

員工一齊幫手舀飯裝餸，派發免費營養飯餐。

一餐飯　換嚟無價笑容
每日為長者提供膳食，換嚟公公婆婆笑住講一句「嘩！咁多餸咁好嘅！」已經好有滿足感。老人家日常娛樂唔多，每日食得開心絕對係天大幸福事。所以機構自設廚房獲ISO 22000食品安全認可確保衛生外，仲有營養師監督營養均衡。有時員工仲會同公公婆婆傾吓計，了解佢哋喜好，如想多魚多菜或初一十五素食等要求都會滿足到。

 營養飯餐特別選用軟腍、多汁食材，方便老人家用膳。

亦有為上班族提供至「營」飯餐外賣服務。

自負盈虧　出售自家食品支援運作
作為自負盈虧嘅社企，主要依靠出售自家製真空食品，所有收益扣除成本後，全數用於派發營養飯餐。所以余小姐坦言工作事事以「慳」為先，令大家嘅心意真正投放畀長者、低收入家庭同有需要人士。而自家真空食物會依時令推出，今夏就有多款消暑食品—秘製醉鮑魚、上湯瑤柱浸冬瓜、杞子醉雞卷等；去年冬至就推出暖身黨蔘蟲草花燉雞、冬菇魚肚炆螺片、糖醋豬軟骨等。

 家常小菜上湯瑤柱浸冬瓜，絕無味精，清爽開胃好有驚喜。

新鮮食材　無味精．無防腐劑
全部食材都係新鮮選購。以醉鮑魚為例，就係去街市買嘅游水鮑魚，再以酒、香料浸煮後即真空入袋，食前12至24小時放於雪櫃鮮格解凍即可。全部食品均無味精、防腐劑，方便健康。

 解凍就食得嘅醉鮑魚，用游水鮑魚浸煮，CP值極高！

母嬰康逸協會　首創陪月幫準媽媽、低技術婦女
大約20年前，新手媽媽嘅支援少之有少，有時甚至要孤軍作戰照顧BB、煲湯補身一腳踢。母嬰康逸協會前身「母嬰康逸社」就於當時首創開設陪月訓練班，令新手媽媽有專業陪月員照顧外，低技術婦女亦獲更多工作機會。

金錢其次　助人更有滿足感
協會業務經理Shirley 提到：「以前工作係諗幫公司賺錢，加入協會後有種使命感想幫人。有時收到準媽媽求助電話，因為經濟、BB健康而擔憂，我哋都會盡量安排心理輔導同陪月員率先照顧，朋友都話我開心咗好多。」幫人嘅滿足感不言而喻，但訓練陪月員絕非易事：「我哋有英國認可證書課程外，並要安排各範疇專業導師，如中醫師、護士、心理學家等，實習時亦有『大師姐』資深陪月員從旁指導，所以每位陪月姨姨都好專業。過程中學員不免感到迷茫，我亦會開導佢哋要用熱誠照顧人，唔好怕蝕底。眼見學員由全無經驗，最後成為資深陪月員，我好有成功感。」

 母嬰康逸協會業務經理Shirley。

多方面支援準媽媽
除咗安排陪月服務外，協會亦致力多方面支援準媽媽，近年陸續引入母乳餵養課程、紮肚服務、上門煮餐服務(月子餐/營養餐) ，等準媽媽放心迎接小生命降臨。

補身燉湯．食品　翻熱即可！
而陪月姨姨重要任務之一，當然係以食療、燉湯為媽媽補身。如果新手媽媽無請陪月姨姨，亦可直接購買協會自家製湯水—花旗參燉竹絲雞、石斛螺頭燉鮮肉、獨子黑蒜螺頭燉雞等，所有湯水真材實料熬製6小時。協會另有自家製藥膳黃酒煮雞、四季花雕雞煲、慢煮南非四頭鮑魚、桂花醉鴨舌等補身食品，全部買返屋企翻熱就得，補身好方便。

多款真材實料熬製6小時湯水。

自家製補身湯水、食品，全部翻熱就得！

傳統薑醋　傳承快樂
當左鄰右里傳嚟薑醋香，就知道有小生命來臨喇，傳統薑醋亦令最近榮升嫲嫲嘅Shirley有更深體會：「當初自己小朋友出世時，係我媽媽幫我煲薑醋。最近孫仔出世時，就到我幫手煲薑醋再派畀親朋戚友，有種傳承嘅快樂。」

薑醋對媽媽別具意義。所以協會嘅古法自家製薑醋都絕不馬虎，單係薑膽就準備1個月，將高質薑刨製、曬乾、煲煮，最後再加入醋、豬手用瓦煲煮出傳統味。所有薑醋都用玻璃樽密封。所有補身湯水、食品、薑醋購買詳情，可參考母嬰康逸協會網頁>> https://www.mbaby.org/shop?category=1

古法自家製薑醋傳承快樂。