每日好多人同我哋擦身而過，可曾諗過當中會有寂寞老人；又或唔敢同人接觸嘅隱閉青年……佢哋背後各有不同故事，需要人關心同照顧佢哋。或者你會覺得自己根本做唔到啲咩，但如果買嘢都可以幫到佢哋，你又會唔會做呢？
「天天加油站」致力幫助天水圍婦女、青年、獨居老人等。
提供就業機會 幫助自力更生
天水圍呢間零售小店「天天加油站」，就為基層市民提供日用品，以極相宜價錢出售米油鹽、小食、飲品等，同時為天水圍嘅婦女、青年提供就業機會，讓他們發揮所長。小店以接近成本價出售日用品志不在賺大錢，只為營運小店，幫助有需要嘅香港市民。你嘅一蚊，絕對幫到佢哋。
為婦女、青年提供就業機會，助他們融入社會。
人人生來平等 基層都可食得高質
小編同店家閒聊，一句「無錢，唔代表無選擇」令我深刻，簡單句子道出理念。所以店家一直努力同各供應商協商，並且推出自家品牌食油、米等，希望用更相宜價錢引入日用品，就算基層市民都有機會食到高品質食物。
店家以售賣日用品為主。
自家品牌食油—「加油」。
送貨上門 照顧老人家需要
店家特別希望照顧獨居老人，所以售賣日用品為主。同時象徵式買滿HK$150 即可送貨上門，就算老人家買少少都可享送貨，非常細心。
店內貨品滿足生活所需，食品、飲品、紙巾等都有。
工展會攤位 齊買平價商品
嚟緊「天天加油站」亦會喺12月23至28號喺工展會社企攤位（3C01號）擺檔，大家都可以平買日用品，包括食油、米、健康小食、奶粉等，買嘢同時支持社企喔！
工展會攤位有售食油、米、健康小食等。
自家品牌食油係由本地某大牌子的油廠製造，高品質食得放心！
健康小食有即食黑豆、甘栗、蓮子等，全部都純天然、無添加、無白糖。
聯乘「八仙餅家」 珍惜香港傳統小店
今次工展會攤位，「天天加油站」仲特別聯乘「八仙餅家」出售傳統糕餅。其實「八仙餅家」係香港老店，一直前店後工廠人手製造各式糕餅。但小店能力始終有限，好少資源宣傳。店家坦言好擔心呢種充滿人情味嘅小店逐漸消失，希望略盡綿力透過聯乘合作，令更多人認識香港老店。
「八仙餅家」係香港傳統老店。
傳統手製芝麻餅特別鬆化，真正做到滿口芝麻味。
油香鬆化嘅合桃酥已經買少見少，傳統老店嘅味道實在難以取代。
南乳餅喺你童年回憶有無佔一席位？今次可以食到真正童年味！
一齊珍惜 香港獨有味道
除咗今次嘅聯乘合作，「天天加油站」希望將來可以同更多傳統小店合作，令更多香港人知道大品牌以外嘅懷舊味道。
支持「天天加油站」 分享溫暖
其實店家不時仲會同老人中心、教會合作，向有需要人士免費派福袋，希望透過更多途徑幫助有需要嘅人。如果你都想出一分力，可以喺12月23至28日，去工展會3C01號攤位支持「天天加油站」，將溫暖傳遞開去。
工展會 2019
日期：2019年12月10至31日 (「天天加油站」參展期為12月23至28日)
時間：11:00至20:00 (12月31日提早於下午6時結束)
地點：香港銅鑼灣維多利亞公園
社企攤位：3C01-04號
天天加油站
地址：港鐵西鐵線天水圍站 23-24號舖（站內近 A 出口）