暑假仲有成個月，已經唔知仲有邊度可以去？咁睇下開飯仔介紹嘅呢間Cafe啱唔啱啦！九龍灣大型商場即將會有間動漫樂園及主題餐廳進駐，同一時間可以食到唔同動漫主題美食之餘，星期五至日仲有多個特別卡通主題套餐。無論帶大朋友、小朋友、男朋友定女朋友去啱哂！

Comic Park & Cafe占地7,000呎，有得玩之餘仲有Cafe畀大家食嘢。一入Cafe，最搶眼嘅當然係牆上面各個經典動漫人物啦，有齊鐵甲萬能俠、幪面超人、咸旦超人、Rody同柴犬等，等嘢食嘅時候就可以瘋狂自拍一番。

Cafe食物絕對唔馬虎，特別請嚟獲得米芝蓮榮譽嘅得龍大飯店以顧問形式主理，主要供應西式同日式料理。美食有埋動漫主題加分更吸引，細細聲話埋畀你知，呢個超人便當盒可以額外加錢帶返屋企㗎！

週末係唔少人嘅Family Day，所以餐廳逢星期五、六同日都會有特設嘅動漫卡通套餐，包括咸蛋超人兒童餐同開心洛迪曼(Rody)兒童餐，唔知用得意造型可唔可以成功吸引小朋友乖乖坐低自己食飯呢？

想一家人齊齊分享就有呢個超人家族M78 星雲家庭套餐選擇，四人份有齊湯、沙律、小食、意粉、Pizza、飯、甜品同特飲。最得意嘅一定係碟咸蛋超人大頭嘅炒飯！

另外當然唔少得夏日解渴一流嘅特飲啦，例如呢三款分別係藍柑柚子、菠蘿百香果，同洛神花黑加倫子口味嘅星空梳打，仲配埋主題杯墊㗎。

女士想滿足埋甜品胃嘅話，亦有各種蛋糕、梳芙里同芭菲等甜品揀。呢個開心果梳芙里配埋朱古力粉Rody，見到立刻心心眼！

餐廳預計八月上旬正式開張，Mark住地址約埋屋企人同朋友，咁就可以第一時間去試啦。

隨時接收最新資訊
讚好OpenRice專頁！