呢度嘅裝修唔似平時嘅格仔糖舖，啲糖一係就有包裝嘅，一係就裝喺一個個透明樽入面。唔係淨得熊仔糖同果汁糖㗎。
離遠望埋去，首先就會畀啲大粒糖吸引咗。彩虹波板糖有大枝有細枝。
另外有啲獨角獸呀美人魚嘅糖，同埋嚟自英、美兩國嘅原朵壓花波板糖，仲有啲金粉喺裡面，囡囡見到一定會係咁嗌「好靚呀」。呢幾支糖，連埋入面嘅花，成枝都食得㗎，睇下你想揀樣定揀味啦，每隻味都幾特別，例如香檳、棉花糖、梨等等。
慢慢行，逐樽睇，就會發現到好多新鮮嘢，有款心心糖，睇個樣冇乜特別，但一食落不得了，辣嘅？！但辣得嚟又滲有少少甜。仲有幾種酒味、咖啡味嘅糖，都係平時比較少食嘅。
但講到最有潛力最受香港人歡迎嘅糖，應該就係emoji軟糖喇，細細粒，好QQ，真係心心眼㗎喂！100gram 40蚊係就係貴咗少少，但款多樣又靚，每款糖嘅口感都唔同，有軟有硬有煙韌，糖控係要試下嘅。
連蛋糕都有得食！款式都唔少㗎，主要係以朱古力mix夏日生果為主嘅brownie同loaf cake，質感鬆軟。
文：Kar
隨時接收最新資訊
讚好OpenRice專頁！