生日有生日蛋糕食，聖誕都有聖誕蛋糕食呀！但係成日揀親蛋糕都喺個櫃台前左望右望，又要揀款又要揀味，偏偏有選擇困難症，望咗好耐都未揀到，然後就畀店員望返住……嗱，開飯仔集咗幾間靚靚款又有節日氣氛嘅蛋糕，喺度慢慢揀定先啦。

少女系蛋糕   Vive Cake Boutique



呢間蛋糕店出晒名整少女系靚蛋糕，今次就有6款專為聖誕而設嘅蛋糕，分別係3款大嘅紅絲絨蛋糕、楓糖合桃蛋糕、雙層杏桃朱古力蛋糕、同3款細嘅雪人蛋糕、蜜糖青檸蛋糕同雲呢拿柚子海綿蛋糕。
粉藍色嘅楓糖合桃蛋糕，外層酥脆，食落又有啲似棉花糖咁，楓糖醬牛油忌廉夾心加埋白朱古力片，係sweet池嘅感覺呀！而細細件嘅蜜糖青檸蛋糕，以雲呢拿海綿蛋糕做基底，配蜜糖、青檸味嘅意大利軟芝士忌廉，仲特別加埋青檸皮嚟增加口感，甜甜酸酸，唔怕滯。

價錢：$45 - $1500

朱古力蛋糕   DALLOYAU



呢款限量Choco Tempting蛋糕，係佢哋第一次推出嘅，全人手製造同埋無麩質，雪凍食又得，室溫或者叮熱（微波爐800W，30-45秒）食都得，三種食法三種口感，睇下你想食到實實地似雪糕嘅質感，定係要軟心朱古力嘅感覺嘞。邊種食法都好，用62%黑朱古力豆整出嚟嘅朱古力味，都好香濃，而且唔會太甜呀。

價錢：$188

紅絲絨蛋糕   Lady M



Lady M每年聖誕都會推出美式經典「紅絲絨蛋糕」，今年都唔例外呀！三層紅絲絨蛋糕中間夾住cream同cream cheese，好滑口，而蛋糕亦都好濕潤，口感幾好。想食嘅隨時去門巿都有得買，但如果想要晒成個嘅，就要網上訂購喇，限量發售㗎。

價錢：原個 $680、每件 $68

伯爵茶蛋糕   Harlan’s Cake Shop



除咗傳統嘅木頭蛋糕之外，今年仲有2款新口味：伯爵茶榛子慕絲蛋糕、檸檬柑橘乳酪慕絲蛋糕，一款茶味香濃，中和咗朱古力嘅甜膩感；一款就充滿清新果香，夠晒light。另外，仲有3款童年回憶系列嘅蛋糕——係小雲同小吉加宇宙大王呀！呢3款IQ博士系嘅味都幾吸引㗎：豆腐芝麻、綠茶紅豆同荔枝玫瑰，買個返去開P就真係「嘻嘻哈哈開心到不得了」喇！

價錢：$38 - $280

金栗黑莓慕絲  Paul Lafayet



兩款聖誕蛋糕，一紅一白，紅色嗰款切開係雲呢拿mousse搭酸甜紅莓夾心，而白色嗰個就係栗子mousse搭黑莓夾心，甘香幼滑。唔使驚聖誕大餐好多嘢食會食唔晒件cake，呢兩款都有size揀，想淺嚐一下嘅，細細地要件手藝餅都得。

價錢：$48（一件）、$220 （半磅）、＄490 （一磅半）

雪糕蛋糕   Haagen-Dazs





幾時都咁受歡迎嘅Haagen Dazs，趁聖誕都出咗4款卡通雪糕蛋糕呀！有曲奇呍呢嗱味嘅米奇、士多啤梨味嘅米妮、朱古力士多啤梨味嘅雪人小白，同埋perfect match嘅蜂蜜核桃味X小熊維尼呀，全部嘅造型都好鬼靚，卡通迷好易心動。

推出日期：12月6日起（須於最少4日前預訂）
價錢：$449 - $769

文：Kar



聖誕特集：
食平啲啲 轉戰聖誕Lunch Buffet
全港首個波板糖自助餐！ 2大聖誕巿集邊行邊食
聖誕禮物送乜好？8大給__ __ 的聖誕禮物建議返
聖誕大餐有平有貴 特色聖誕buffet精選
味覺想旅行！多國聖誕套餐大哂冷
聖誕自家製Party Food推介！
聖誕禮物送乜好？聖誕tsum tsum版Haagen Dazs很想要吧
星巴克聖誕驚喜！石榴鮮奶抹茶新登場
環球聖誕食呢啲


 

隨時接收最新資訊
讚好OpenRice專頁！