想去個快Trip嘅朋友仔，推介你今個月中快閃澳門，去一連十七天嘅年度大型活動「第二十五屆澳門美食節」食盡玩盡佢！今屆美食節由澳門餐飲業聯合商會主辦，而澳門「創意城市美食之都」嘅美譽，可以喺會場140檔美食攤位展現之中展現畀大家，齊齊感受中西匯聚多元飲食文化，將傳統同創意餐飲共冶一爐！掃完美食再玩11個遊戲攤位、欣賞特備表演，節目夠晒精彩又豐富～如果夾啱11月13至16日過海，可以睇埋「第72屆澳門格蘭披治大賽車」；11月9至21日則有「第十五屆全運會澳門賽區」賽事，一行幾得呀！
圖：活動官網
橫掃歐亞美食+甜品
美食節以6大食街劃分140檔美食攤位，方便你逐條街揾食！中式美食街、歐陸美食街、亞洲美食街、風味美食街、日韓美食街以及甜品街，將各國嘅惹味小食同特色菜餚呈獻畀大家，輕輕鬆鬆以舌尖探索世界。
各種海鮮菜式足料大份 (圖：活動官網)
熱辣辣嘅燒物香口暖胃，大人小朋友都鍾意 (圖：活動官網)
美食攤位名單
現場除咗葡撻、蟹料理、越式粉麵、串燒、Pizza、Gelato、咖啡等美食，仲有啤酒同棉花糖攤位，細心照顧晒大人同小朋友需要。仲有仲有！攤位佈置比賽會喺活動第一日進行，次日公佈冠、亞、季軍以及優異獎結果，各位想打卡探店就捕實喇～而家先mark低心水攤位，留定個肚去「掃街」啦！
「美食之都」系列活動
為慶祝澳門美食節25週年，澳門餐飲業聯合商會將同期喺澳門銀河國際會議中心地面層舉辦 「美食之都」系列活動：
1) 「國際中餐廚皇爭霸賽」將邀請全球超過40多個國家/地區嘅代表團隊參賽，以團體賽、熱葷賽、點心賽三個組別形式比賽，促進美食文化交流同了解，同時令各地粵菜廚藝得以傳承，亦融合創新烹調手法，提升風味。
2) 首屆「國際餐飲智能設備博覽會」涵蓋餐飲行業以及酒店最新產品設備、科技、服務同技術之外，國內外優質餐飲設備同用品行業品牌都會參與，推動餐飲產業鏈上下游各環節嘅同業交流，仲可以即場進行洽談配對，創造更緊密聯繫嘅平台。
日期：2025年11月14日至11月30日
時間：星期一至四：16:00-23:00；星期五至日：15:00-00:00
地點：澳門旅遊塔前地西灣湖廣場
票價：免費入場
詳情：（按此）
直達巴士上車地點：
1. 黑沙環市場街（祐漢街市對面）
2. 氹仔成都街
3. 關閘廣場（入境處左側）
