明發小食

营业中

休息中

第一次嚟到深水埗嘅明发小食，紧系要试下佢哋嘅招牌菜啦。我哋点咗净汤鸳鸯饺子，分别有韭菜饺同椰菜饺。饺子皮薄馅靓，椰菜饺入口爽甜，而韭菜饺加咗爽脆嘅马蹄，中和咗韭菜浓烈嘅味道，平时好少食韭菜饺嘅我，都忍唔住要食多只。如果钟意有少少辣嘅，仲可以再加埋辣椒酱呀～之后出场嘅系怀旧猪油渣面，听到猪油渣面，可能会觉得好油腻，其实经过低温油炸之后，已经逼出咗啲猪油，剩低嘅就系碗上嘅猪油渣啦～入口嘅时候猪油渣香脆可口，唔会觉得好肥腻。而上海面条口感烟韧，呢碗猪油渣面份量都算多，可以叫埋其他食物 一齐happy share！另外仲叫咗一碗细嘅三沟，即系鱼肉同碗仔翅加埋生菜，手打鱼肉嘅份量好多，而且鱼肉非常弹牙，加埋果皮、肉丝、蛋花、冬菇同粉丝，唔单止好足料仲好抵食。最后仲叫咗两款甜品-自家制嘅豆腐花同埋巴斯克芝士蛋糕，两款甜品各有特色。豆腐花嘅豆味浓郁，又香又滑。而巴斯克芝士蛋糕充满芝士嘅香味，又唔会觉得好腻。今餐食到好饱呀，下次经深水埗可以再食！