BACI Trattoria · Bar

同朋友喺星期日中午去食佢哋嘅brunch semi buffet。出面自助攞嘅嘢食全部都好合理，salad bar、凍海鮮同埋肉全部都好合理。但係，佢本行做嘅pasta同pizza都好一般。rigatoni完全唔煙韌，bolognese好淡味。carbonara尚可接受，不過冇蛋黃同芝士香味。pizza嗰個厚薄好奇怪，又唔係傳統意大利pizza嘅薄，個底淋晒，仲要厚嘅位唔係好咬得郁。我哋覺得最差係甜品，全部都係好濃好膩好甜，乜都有陣金莎嘅hazelnut味。

食物質素中規中矩，但係服務完全唔可以接受。pizza漏咗單，等咗半個鐘都未有。收碟都算快，不過完全唔識幫人哋換餐具同加紙巾。另外，如果唔想俾錢飲水嘅話要小心，一坐低就問我哋水要still定sparkling，咁我哋諗住香港水喉水唔似得喺外國餐廳咁飲得，所以叫still water。點知埋單先知原來still water都要收錢，$38一支，但係其他檯係飲緊普通嘅水。如果有普通水但係佢冇同我哋講，然後仲要係咁幫我哋斟水所以開咗兩支，咁就好似有啲老土囉，估唔到呢個年代仲有餐廳呢個位會做得咁尷尬，仲有隻烏蠅飛來飛去！

嘢食唔係特別標青，但係服務真係好一般，唔會再返嚟😓