德華茶餐廳 (已結業)

今日叫左個白汁焗雞扒意，諗住焗飯冇咩技巧穩陣啦，落單之果時阿姐同我講焗嘢要等耐啲，咁ok啦，1141落單，然後1144放左碟相信係白汁焗意嘢物體喺枱。3分鐘出到個焗嘢而經心知不妙。

望到個意粉，我當堂嚇一跳😨，然後得啖笑😅，個意粉有十片八片未熟嘅紫洋蔥，再加啲青椒，面頭有塊芝士，下面有塊烚雞扒，紫洋蔥加青椒呢個組合睇落已經麒麟怪，跟住個汁係透明，你冇睇錯我都冇打錯，係透明，白汁點解會透明，仲要希到水咁，完全冇味，個意完全冇焗過。

我問阿姐，你哋啲焗嘢平時係咪都係咁，阿姐同我講，佢話呢度係咁，一時時，佢都唔知，然後行左。


最後食左兩啖就成個冇食，$62食個焗嘢都係正常價，但係呢個焗意我諗係要間餐廳要比返$62個客。

有人形容一啲好難食嘅食物，佢哋會話嗰啲嘢食只係能夠維持生命。但係如果地球得返呢間餐廳嘅話，我諗我會結束自己生命。