前幾日行街時，男友忽然話想食刺身，
於是就重臨2000円。
上到去，人唔多，男友叫左個刺身飯，我叫左個日式牛肉鍋。
價錢ok平，一個$48，一個$56，有埋日式魚翅湯＆甜品(桂花糕/啫喱)
男友話個刺身飯好唔得，d飯好酸，d刺身亦好唔新鮮，我試吃一塊魷魚，好腥臭！！！:(
而我既日式牛肉鍋就正常貨色，唔錯唔錯！湯底ok濃，都幾多牛肉！:)
本身仲諗住夜晚去2000円食放題，點知佢d刺身退步成咁，即刻打消念頭！
而店員既服務態度亦令人
男友見到menu張圖，問佢呢個係邊一款刺身飯，
男店員：「下？邊款呀？呢個？唔知喎！係卦！應係呢個卦！」
語氣大大聲又好疑惑，搞到我地仲疑惑，不過最後佢都去左廚房問。
「喂！問左啦！係呢個呀！」
佢好似當左我地係佢識左十幾年既老友般呼喝，感覺幾搞笑！
我下單時，再三同佢講明牛肉鍋要走蛋，因為我食完蛋會敏感，
但係黎左時依然見到打左隻蛋落去，息事寧人，免得再勞煩男店員，
唯有好小心咁"畢"走隻蛋… :(
食食下野時，有另一名男店員係隔離張枱擺設緊餐具，
跟住成隻裝豉油既碟 竟然剛剛好飛入我個袋入面 (準確到我都忍唔住笑)
我拎返隻碟出黎俾返佢，佢竟然默不作聲，木無表情地接過隻碟，
施施然擺返好就走…
今時今日咁既服務態度，真係令我大開眼界
