1
皮蛋肉碎粥 $5.8
咸到以為點左咸蛋咸瘦肉粥，幸好粥水夠綿，料頭充足，間唔中食下都幾抒情。
臘味蒸蘿蔔糕 $8.8
個名少左個「味」字，又唔夠霸氣，應該叫分子臘味味蒸蘿蔔糕。一上枱已經震攝人心，油水充足之餘，淨係食到臘味既油膱，但實體既臘味就一粒都見唔到，難度食緊分子料理？
鮮竹牛肉球(小) $10.8
牛肉球本身無咩問題，仲幾嫩滑，不過配埋D疑似喼汁就真係正，淡中帶酸，苦得黎澀，簡直糟蹋左舊牛肉！
炸兩腸粉 $12.8
份量幾對眼，腸粉都幾軟滑，但係炸兩林既，好彩D角落頭仲有少少脆。
鴛鴦燒賣皇(優) $13.6
係我見識少，又一廂情願以為係傳統著黃色衫果款燒賣，點知黎到只係兩舊赤裸裸、肥騰騰既肉團，分別頂住舊冬菇同豬肚。咬落去肥瘦分明，即刻口甜舌滑，把口「啷」 過油。肚餓既朋友記得點呢樣點心，食一粒已經夠滯。
