新明發食家 (昌運中心) (已結業)

Item: 新明發食家 (昌運中心)
Rating: 3
Author: 奧志雷

大埔

$50以下

粤菜 (广东) 点心茶餐厅/冰室

奧志雷

等级4

2.1K

黑氣纏身，勁黑仔！用左 45 分鐘由紅磡去旺角，趕唔切返泰拳，放棄！改變計劃去買拳套，但無貨所以買唔到！街去隔離街想試肥姐小食，排長龍誇張到打晒蛇餅。真係火都黎呀，嬲嬲地跟上的士飛返大埔。左諗右諗都唔知食咩好，突然排骨飯在腦海一閃 ﹗

驚見新明發開左分店喎，恭喜晒 ﹗我又多一個地方可以食到頂級豉椒排骨飯喇，不過只做外賣自取，不設堂食呢。依間分店應該只做外賣喎，何解會有張摺檯呢？提供比食客就地速進餐，還是職員專用架？

嘩，洗唔洗咁多食客排隊呀？雖然真係好好食。每次必定排長龍既新明發排骨飯，只有大埔街市林記可以跟新明發拼得難分難解。不過往往都是質量穩定的新明發佔優，街市林記您生性啦。

豉椒排骨飯，飯粒要用幾種米混合煮成先夠香，質感才會多樣化，每間蒸飯店既配方都係自家秘傳，各有不同架。當然都有食肆粗製濫造，求期出品劣質飯底啦，例如尖沙咀新港城廣場樂也樓。另外唐記、點盅皇、芯怡、等等，都未能達我要求呢。

新明發質素超穩定，飯香傳千里，香噴噴籠罩幾條街，那怕搵唔到間舖位置呢。飯粒乾爽飽滿脹卜卜，嚥韌有咬口，我非常之喜歡 ﹗每粒飯之間還留有空位透氣，更加通爽 ﹗唔會濕淋淋、唔會腍劈劈、唔會黐埋一舊舊 ﹗加上靈魂甜豉油，清香可口，不嗆不濁，精髓所在 ﹗開胃醒神，越食越起勁，連食兩碗都唔會覺得膩，要添食再添食 ﹗

排骨嫩滑無比，肥瘦適中，沒半點多餘肥膏，軟棉啖啖肉，肉汁兇湧澎湃。甜美豬肉濃濃，醃味吸引不能抵抗，無可挑剔的極品。讓鬆軟靚排骨躺在甜豉油撈飯之中，飯粒緊緊的抱著她，大大啖塞入口中 ﹗肉香飯香、肉汁飯味，打得火熱，好食到不得了 ﹗

最後使出必殺技，混入大量辣椒渣品嚐，神級之作 ﹗飯粒乾爽嚥韌、排骨軟滑啖啖肉又香甜，甜豉油清香加上香辣辣椒渣，太美味！一羹一羹不停地食，想一下子將所有食晒落肚呀！排骨份量真好多，飯已食到一粒都無剩，但排骨還有很多啊。朋友仔略厭飯粒太硬太乾，不過我極討厭食濕飯，腍劈劈質地邊好食架 ﹗只不過係個人口味，無緊要。

豉汁排骨，與排骨飯的排骨同出一徹，美味絕倫 ﹗豬肉香甜，醃味可口，肉質軟棉帶彈，不會霉霉散散，啖啖肉，進會不讚 ﹗實在太過美味，掛住食連相都唔記得影囉 ﹗豉汁鳳爪，十分驚嚇 ﹗我真心食到陣隔夜酸宿味喎，放棄。

潮州粉果，必食推介，唯一我會食既潮州粉果 ﹗暫時食過最好食，質素高、味道好，仲要係無蔥、無西芹、無芫茜、無花生。餡料鮮甜肉鬆可口、粉葛脆而清爽，外皮棉彈嚥韌，不油不膩。加上自家秘製辣椒油超級香辣，好惹味好刺激 ﹗

一羮辣椒渣送一隻粉果剛剛好，大量辣椒渣躺在粉果上，要好似搽牛油那樣大大篤放係粉果上面，再大啖啪，毫不猶豫塞入口，美味極了！連食半打都可以，微辣而非常香口開胃，侍應阿姐見到都嚇親啊 ﹗硬係覺得辣椒油不及以前濃郁香辣，差左又淡左，唔知大埔墟總店會否無變呢？

乾蒸燒賣，普通的豬肉燒賣，質感偏腍，不結實而鬆散，蒸得過火濕淋淋。幸好熱騰騰，不肥膩而且味道過得去，撈埋辣椒渣即刻好味左。水晶蝦餃，的的骰骰細細粒，餃皮超厚仲好硬添，厚得黎又透明喎，若隱若使人霞想。硬皮包著的是爽咸蝦肉，過過口癮還可以。

四寶雞紮，不知道由那時開始雞紮轉用芋頭做餡，我不吃的，討厭 ﹗記憶所及，兒時雞紮是豬肚的呢，其實用冬菇、鮮淮山、火腿條、蟹柳都好好味架。因為價錢？功夫？最難食遇過珍珠筍及節瓜，味道完全唔夾，好搞笑。

亦不知道何時開始四寶雞紮要折開來吃，續件食還是紮嗎？漢堡包折開續樣食材食，還是漢堡包嗎？公司三文治折開食，還是公司三文治嗎？新明發待我都不薄，依然用上魚肚，不是豬皮扮魚肚，多謝。

正宗食法當然是一口咬落雞紮，腐皮捲著雞柳、魚肚、火腿條，多種質感與味道交融，美味無窮 ﹗滑滑嚥韌的腐皮充滿濃郁汁液，濕潤可口。大大舊雞柳醃味甜美，結實滑彈又多汁。火腿條咸香出眾，極具彈性。鬆鬆棉棉的魚肚白雪雪，既軟且滑，索盡各種精華，百味交雜，香甜無比，好好味呢 ﹗有食肆真的用豬皮代替魚肚，真係以為食家們食不出嗎？

鵪鶉蛋燒賣，懷舊手功點心 ﹗大大粒鵪鶉蛋黏著大大舊肉球，使我聯想到上面係水晶球，下面係球座呢，有趣 ﹗食肉獸殷物，啖啖肉無甩拖 ﹗肉球充滿彈力，肉汁微滲，豬肉味香甜，配甘香濃郁蛋黃，味道真的襯到絕啊 ﹗