Amour Garden Grill & Bar (已結業) 查看

因为之前帮衬过呢间餐厅品牌，留下咗印象，今次与情人转移阵地，改喺另一个地点约会……相隔不到一条街，感觉完全不一样。呢间餐厅连吧位于砵兰街心脏，对以不是常客嘅我(笑)，一点也不好找，对于女士嚟讲，更加需要一点勇气，有男伴同行另计。讲返正题，今晚点咗香煎鸭胸伴咸蛋意粉，估唔到有惊喜，鸭胸厚肉唔韧，咸蛋碎切融入意粉中，味道刚好。烟三文什菌墨鱼汁意粉，叫得就唔怕染黑棚牙，佢啲墨汁唔多唔少，意粉圈起汁都冇四围飞，入味兼好有墨鱼味，配合冻烟三文同食，一冷一热，徘徊冷静与热情之间……仲有青苹果鹅肝多士，膻香在口腔回荡，饮返杯longisland，清清喉咙，望下啲人掟镖、睇下大电视、倾下心事，怡然自得。