芳姨車仔麵 (已結業)

點解街坊食堂，隱世美食呢啲字眼會令人趨之若鶩？因為喺呢個就嚟周街只剩低連鎖店嘅都市，有啲人對質樸，有個性嘅味道，仍然係有所渴求嘅。廢噏一大堆，開得飯未？得得得，行入「芳姨車仔麵」食個便飯吧。芳姨係邊個唔重要，正如大家姐，四姐同華姐係邊個，大部份入嚟食嘢嘅人都未必在意。食物質素如何？車仔麵可以㨂嘅餸種類好多，X仔、乜哥米線有得揀嘅呢度基本上都有，就連無嘅，好似象拔蚌呢啲，都有！至於湯底，亦有得揀唔同辣度嘅麻辣或酸辣。有幾「梗」？可以講嘅係三小辣已經令人感覺相當刺激。最正嘅係，個湯底無論係麻定酸，滋味得嚟感覺好清新，唔會覺得好似食咗好多味精，口渴到爆（所以係無呃你嗌嘢飲架！）。至於麵底，亦有多種選擇，當中嘅江西米粉，即係大家日常食嘅米線，滑溜溜唔哽胃，完全唔需要嗌「米林」。除咗車仔麵，呢度仲有湯飯，碟頭飯任君選擇，小食亦有好多，淨係雞翼，都已經有四川烤、香草烤、鹵水、同花雕可以揀，舖仔細細，咁多選擇，真係唔講得笑。呢度最正（又或者最唔正，睇你點睇）係人手唔多夠，樓面嘅靚姐，招呼完你坐低，轉個頭又入咗廚房幫手，整一陣上完菜，又趕住清枱收錢，忙過Diner Dash個靚女。不過就算係咁，佢都勤