快活谷餐廳小廚

营业中

休息中

今日有免費電車坐，搭叮叮嚟跑馬地行下，順便在區內搵食，喺斜路見到有間「快活谷餐廳小廚」。餐廳主打茶餐美食，而晚市就有鑊氣小炒、家常小菜等供應。一坐低店員就隨即為我哋送上每人一碗節瓜紅蘿蔔豬骨湯，湯底清甜鮮香，飲落好滋潤。菜膽雞，雖然只係點左半隻，但原來份量都幾多。菜膽清甜爽脆，雞肉嫩滑，入口滲出雞香，讓人食慾大增。西蘭花炒龍躉球，龍躉大件肉厚，魚香濃郁，嫩滑得來啖啖肉；西蘭花翠綠爽口，做到酒樓風味。燒汁雜菌炒鮮牛，牛肉香嫩多汁，雜菌爽口帶點菇香，配上鹹甜燒汁，令味道互相提升，佐飯一流！飲品點左凍奶茶同凍檸樂，奶茶茶味濃郁，奶香順滑；檸樂汽泡感強，飲落好爽快。飯後仲有喳咋糖水送，用料好豐富，芋頭粉糯，豆類軟腍，香甜中帶濃郁椰香。