759車仔麵 (已結業)

今晚我們約咗要喺屯門碼頭做嘢，但我們比約定嘅時間早到咗，所以我們去咗隔離嘅海趣坊食一個特快晚餐，所以我們就選擇咗去「759車仔麵」食晚餐！我們叫咗精選常餐：香煎鷄扒米線嘅湯底係淡而無味，米線嘅麵質非常腍身，一啲都唔彈牙，而鷄扒都算大塊，但就對唔係香煎，好似就咁白烚咁，味道極之淡！而跟餐嘅火腿煎蛋拼牛油多士就不過不失！南乳鷄中翼拼台式肉燥飯同生炸鷄脾拼台式肉燥飯嘅肉燥味道雖然都幾惹味，但油嘅份量就比較多，所以感覺好油膩，南乳鷄中翼真係醃得好入味，所以味道超級鹹，而生炸鷄脾就炸得外層相當金黃香脆，肉質亦好嫩滑多汁！三餸車仔麵：咖哩魚蛋可能係經過長時間浸泡著，所以食落感覺好似一粒空心嘅魚蛋咁，爽滑牛孖筋就好軟滑煙韌，而且都幾入味，牛肉片嘅肉滑唔算好鬆軟，味道亦比較淡，而粗麵嘅麵質就相當硬身，好似未曾煮熟就攞出嚟咁！跟餐嘅餐湯係海帶湯，味道係比滾水有味啲啲，而且海帶係咬唔開，真係令我們覺得超級失望呀！