潘明記 (已結業)

位於大王東街嘅潘明記，睇Openrice知道係好多聚居於灣仔嘅外國人嘅喜愛餐館之一，怪唔之得價錢都非常「西化」，一個午餐閒閒地都要$88-$98，雖然聽上去感覺唔算太貴，但係佢嘅食物質素絕對配唔起呢個價錢，喺普通茶記都可以食到嘅水平，而食材亦唔算矜貴，根本唔需要賣到咁貴；份量嚟講亦唔係特別多。味道方面，筆者嗌左糖醋排骨(配白飯)($88)，醬汁味道濃郁，不過排骨嘅骨同肉比例懸殊（大概係8：2），鍾意食肉多啲嘅朋友就最好唔好嗌呢個餐了~餸菜同白飯分開上，呢一點值得一讚。另外，佢嘅飯碗同裝飾非常有中國風，相信呢一樣野亦係吸引外國人嘅原因之一。整體而言，餐館食物價錢偏貴，性價比低，不值得推介。