緬甸招牌湯米線 (已搬遷) 新店位置

成日紅雨黃雨，令人哋唔想出街。但都要出去食嘢架。今日下晝，來到旺角呢一間毫不起眼嘅小店。雖然店舖面積非常細小，但係嘢食都幾特別。小店名為「緬甸招牌湯米線」，售賣的係緬甸菜。河馬生同我叫了店裏最出名嘅兩款食品。緬甸魚湯米線配炸豆餅。初時睇相以為係咖喱，不過原來唔係。其濃稠既湯底來自黃薑，雞殼同魚骨，睇上來好似好heavy，但係食落完成唔膩。問問店員，原來炸豆餅係老闆親手炸嘅，裏面有魚仔，食嘅時候都見到有魚仔嘅頭。米線亦都吸湯又彈牙。我對呢碗米線非常滿意。河馬生叫咗番茄滋味撈麵，麵底似中式雲吞麵嗰種幼麵，蕃茄酸甜適中，配上肉粒，份量豐富，每一啖都有番茄同肉粒，令人十分開胃。羅望子喺熱帶地區係一種常見既果實，我哋兩個都叫咗杯羅望子黑糖冰，酸酸甜甜，亦十分開胃。驟眼看見牆上貼有茶葉沙律既相片，下次再來一定要試試。