Riso Café (已結業)

平時行過嗅到幾香，終於都去試。友人叫咗半份夏威夷薄餅配蒜茸包，餡料有粟米、菠蘿同腸仔，蒜茸包係用去皮方包片黎整，唔會好似用法包整咁硬，脆脆地攞黎沾湯食，好好味，南瓜湯,似蓉咁，唔會「熙」，好夠味。我叫咗半份煙肉薄餅，餡料有煙肉、洋蔥同紅蘿蔔配薯角洋蔥同紅蘿蔔都仲好生，所以食落好爽，無咩醬汁，好乾，餅皮唔算好厚，亦唔係薄身脆脆嗰隻，食落「煙煙un un」咁，唔係幾好食。蜆肉意粉用黑椒、青紅椒黎炒，意粉偏「林」，用紙盒裝，（意粉如果用膠碟唔係可以防止啲醬汁俾紙餐具吸晒咩，定係佢諗住紙盒可以吸去多餘油份？），反而薄餅就用膠碟，唔明點解唔統一全部用一種紙餐具或者只用膠餐具。仲有一杯士多啤梨沙冰,飲咗一口，覺得係嗰啲藥水味黎，所以無再飲，而友人就覺得唔似喎。只可以話啲價格平囉，食就真係好麻麻。如果想食平價薄餅，我寧願食Ok有餅鋪專櫃整出黎嘅薄餅，推介煙肉蘑菇薄餅。