國際咖哩館 (已結業)

我食咗超過廿年，以前兩間連舖位時，有個中年阿叔做企堂時成日幫襯。知老細做埋5月榮休，我特登約埋阿爸過晒午市繁忙時間先去食。一坐低張檯有上手食剩啲食物碎，等極都無人招呼抹檯。唔緊要，我自己有紙巾抹。佢地放低餐牌時其實我已經可以落單，但佢地咁忙唔知忙乜？只係聽到佢地無羊，好多客叫羊都無。等咗好耐我落我最期待嘅蘇門塔納牛同幫阿爸落個咖哩牛腩，因老父戴假牙怕太韌，特交代吓可唔可以俾啲淋啲嘅，佢一野得落黎話無，要淋只有食牛脷或牛𦟌，咁好啦，我照要。等咗好耐終於黎咗，個侍應上菜時好輕佻咁講咗句一黑一白，黑白無常呀。當時我爸已黑面非常唔高興，我地叫一黑咖哩一白咖哩，好心妳唔想做或就黎無咗份工都唔好亂咁嗡野啦。所以我爸份白咖哩牛腩佢俾錯牛𦟌我都無心去講去換啦，只想快快食完走。論食物，國際咖哩館嘅蘇門塔納咖哩，味道一如既往十年如一咁好味，每次必叫。但今日侍應咁嘅待客多口態度，真令人摸不著頭腦，不安到令人唔想再幫襯。任憑你食物幾咁好味，啲侍應咁口沒遮攔，香港飲食業做唔住唔係無原因嘅。