🗓(24/4) 星期一 ⏰ 晚上7點左右
💈特式：收工返到屋企附近又係開始諗食咩嘅時候，記得FB街坊group最近好多人提及呢間鄉港，咁身為真香港人就梗係要去試下啦。
不過呢間餐廳嘅位置真係有d唔起眼，如果唔係住附近嘅人都應該會幾難搵。
🥩🍔🌭🌮🥗🥯🥘🍲🍝🍣🥟🍤🍱
食物：因為我地係第一次食，所以都係按照menu上嘅推介食物嚟叫，而家等我同大家講下🍝味道先。
虎蝦辣香蒜炒意粉$85 - 個意粉係即炒，所以要等5~10分鐘左右，一上枱就見到個擺盤都幾靚，已經好吸引。
先講下個意粉底，落order時店員有提到需唔需要小辣，咁我另一半唔係太食得辣，所以就揀左小辣，所以個炒意粉辣味只係好輕微，不過其他配料同蒜味就真係好香濃，意粉亦都做到有咬口彈牙嘅質地，而且炒得夠乾身入味，相當有功架🍝。
兩隻大蝦反而就係用比較清淡嘅方法烹調，我有問過店員點解唔將隻蝦都做得比較濃味或者走油炸香個蝦殼，咁就可以同個炒意粉更加匹配。店員都好老實咁回答雖然佢地用嘅係雪藏蝦，但佢地好用心咁將佢做到同新鮮蝦無分別，包括做到完全無雪味同腥味，所以佢地唔想比人覺得係用重口味去掩飾，咁呢一點佢地都做得好成功，我一開頭真係以為食緊新鮮蝦🦐。
香煎厚切牛脷飯$75 - 呢個牛脷飯係我近期食過算係比較出色之一，佢大約有4片牛脷，而且都真係厚切，入面包括牛脷同牛脷芯，好明顯食得出兩款唔同嘅口感同質感，鐘意食淋身d或者爽口d都兼顧到。
有問過店員食到牛脷芯係咪要靠運氣，店員回覆話佢地每碟都係會包左牛脷同牛脷芯兩款，唔會大細超👍。
☕️🍵🥤🧋🍺🍷🥃🍹🧉🍾🍶🥛
飲品 : 主菜有包埋一杯餐飲，凍飲就要加$3蚊，都係普通咖啡/奶茶/檸茶/檸水，質素都唔錯，正常茶餐廳級數。
🍽環境：餐廳地埋位置就麻麻，位於舊商場小巷內，比較唔起眼，坐位大約得十多個，餐廳裝修亦都唔算好豪華，只係普通茶餐廳裝修，但勝左光猛整潔衛生。
🤵🏻🤵🏻♀️🤵🏻♂️服務：店員服務就真係唔錯，會關心客人食唔食得辣，亦會不時問下客人食物啱唔啱食，同埋收集下客人意見方便改進，呢一點都好難得。
💰💸價錢：叫左兩份主食，埋單就$163蚊，呢個價錢雖然係紅磡區就唔算好平，但佢地嘅食物質素分分鐘比起d高級西餐廳仲好，所以以性價比嚟講，我覺得係幾抵食。
🐲💬總結：我個人就最鐘意幫襯同支持一d小店，尤其是香港人主理嘅餐廳，再加上有高嘅食物質素就更加應該要支持，所以我絕對會回頭幫襯。
推薦指數：❤️❤️❤️❤️❤️
