藝穗會Colette Artbar (裝修中)

附近睇完展览觉得肚饿就一于入去食，冷气好凉，夏天热辣辣入去真系好爽，或者都有户外位任你拣。食午餐，入面系buffet形式嘅，仲有个bar系隔离嗌嘢饮，食𠮶日系亚洲菜色，不过都有好多款面包呀蛋糕同沙律拣，斋面包都已经有四、五款，然后搽面包又有四种可以拣，有两款芝士又有蒜蓉牛油同Cream Cheese，比起其他得普通牛油嘅buffet真系好有心。讲翻主菜，我都系事后睇翻先知系素食buffet，我依啲平时唔系食开素嘅觉得好健康，但系又唔会好似印象中嘅素食餐厅咁无聊，好惊喜，真系唔好因为见倒系素食就却步，一定要入去试试。全餐饭我最钟意佢个奶油炖菜，奶油嘅味道啱啱好，好顺口一个唔小心就食左几转，而且全部𩠌都热辣辣，见住佢一兜清晒另一兜即刻上。环境都好舒服好干净，有景睇，入面又有唔少画同自制嘅装饰，食饱之后同朋友坐左阵吹下水影下靓相。总括成个经历都系开心嘅，以后经过中环会再去。