就梗要帶屋企人黎到由張敬軒創辦既仙后餐廳食餐好野慶祝下啦
上年生日黎食過一次晚飯, 今次再試下English afternnon tea, 順便打下卡 !
餐廳既門面已經有一種舊香港既英式設計, 旋轉門好有特色, 連餐廳外圍都有設計過,未入餐廳都已經好多人影相打卡
tea set係3:15pm開始食到5:15pm, 就算早到左都係要3:15pm先可以入座, 所以由2:45pm開始就好多人係門口等同埋影相
可能係我地3星期前就book左枱, 餐廳留左梳化卡位比我地一行3人!
聽聞而家因為疫情關係, 平時要食貴set先可以去隔離水晶燈舞台入座, 而家冇再分, 只要早d book枱就可以入座果邊既枱, 有靚靚水晶燈可以打卡! 大家記得早d book枱啦~ 
上年黎既時候有部鋼琴係中央, 有人唱歌同伴奏, 今年疫情關係取消左, 轉左櫻花樹既setting, 襯返tea set 主題, 又多左個靚相位啦!
而鋼琴就放左係BAR枱隔離
餐牌- 728 for 2 person 我地3個人, 可以照食一個tea set share, 不過要加一杯飲品. 我地就嗌左Cappuccino, rose tea & chocolate. (要加$30) 另外岩岩入座時侍應會問飲邊種水，sparkling water係要收費既 68/一樽
Chocolate - 有3樣配料可以加入朱古力, 1)脆皮朱古力包著既雪糕 2)朱古力脆脆 3)Cream
幾特別, 可以自己按口味加配料, 值得一試既, 不過實在太heavy!
飲完好大罪惡感, 下次未必會再試
媽媽嗌既Cappuccino, 雖然冇拉花, 但外貌都好靚, 咖啡好幼滑, 媽媽好鐘意!
仲有rose tea 就略遜一籌, 花香味唔突出, 好普通
不過茶壺+茶杯一樣好靚
A Little Life 主題afternoon tea - 三層架, 第一層甜點, 第二層咸點, 第三層就係鬆餅, 另外仲有一個藝術品般既蛋糕 (抹茶海綿蛋糕配朱古力餅條)
侍應上碟時介紹左好多, 不過講到急口令咁, 唔係好聽得清楚
總之就係藝術品啦! 哈哈
連埋D蝴蝶同花花都係可食用既, 味道雖然一般, 但幾飽肚同埋幾特別既, 都好夾個花花主題
一如以往, afternoon tea 就係要由底層鬆餅開始食起, 由咸點到甜點, 不過侍應就冇特別介紹
鬆餅 - 有2款味道, 原味(配JAM-最右 & CREAM-中間) & 芝士乾蔥味(配黑蒜醬-最左)
鬆餅普遍都偏硬同痴口, 唔算好味既鬆餅, 味道好一般
同埋其實分唔到邊隻味, 係冇特別說明既。不過果JAM就係好味既, 唔太甜,果味香
到第2層既4款咸點,
煙三文魚玫瑰花配蘿蔔及檸檬忌廉 - 配搭蘿蔔同檸檬忌廉係幾特別既口感, 煙三文魚既咸味配檸檬忌廉既酸甜, 出奇地夾既口味, 7分
法式雜菜蝴蝶配金黃薯餅 - 賣相100分, 蝴蝶好靚, 都好脆口, 薯片口感
薯餅唔會太實都唔會散開, 好味, 8分
皇帝蟹肉沙律配三文魚籽 - 蟹肉沙律, 加上一片薄青瓜, 好味但賣相略為普通, 7分
青瓜及辣肉腸及燴雜菜撻配鵪鶉蛋 - 開胃小食, 鵪鶉蛋係溏心但冇咩味, 雖然有好多唔同配料, 但都屬同類口味, 味道唔夠豐富. 6 分
第一層既3層甜點, overall 我地都滿意
茉莉花茶慕絲蛋糕配青蘋果啫喱 - 長條形既慕絲蛋糕, 咬開後有青蘋果啫喱, 酸酸甜甜配上外層既茉莉花香, 好味, 唔太甜
賣相又靚, 9分
粉紅櫻花奶凍 - 賣相100分
味道都有99分, 一樣酸酸甜甜, 有淡淡既櫻花香, 入面有濃味少少既莓同醬, 中和返出面淡味D既奶凍, 味道配搭得岩岩好9分
柑桔迷你紙杯蛋糕 - 好大驚喜既CUP CAKE
本身以為普通蛋糕, 但食落去檸檬柑桔味好突出, 同蛋糕既味道好夾, 好好味, 9 分
茉莉花茶慕絲蛋糕配青蘋果啫喱
粉紅櫻花奶凍
每一個SET都會送2個刺繡蝴蝶禮盒, 又有得食又有得拎, 幾開心! 有唔同款, 相信係隨機派款既.
總括而言, 甜點比咸點出色, 鬆餅略遜一籌。餐廳既環境同裝修都係一流, 冇得挑剔
好多打卡位, 掛住影相會唔夠時間食野唯一美中不足既係, 侍應們態度同上年一樣都係差
比人感覺好似機械人, 都有比客人一種自以為是既感覺唔應該係高級餐廳出現既服務態度...令人覺得餐廳硬件出色但欠缺軟件
評分:
環境 ⭐️⭐️⭐️⭐️⭐️
味道 ⭐️⭐️⭐️⭐️
舒適 ⭐️⭐️⭐️⭐
優閒 ⭐️⭐️⭐️
回頭 ⭐️⭐️⭐️
服務 ⭐️
