餐廳環境寬倘舒適，我們倆人更加被安排坐在一張起碼12個人都坐倒嘅卡位！可能因為下午茶時段，反正人唔會太多啦！
我地點咗兩客定食，分別有1）和風薑汁豬柳飯定食；2）檜御膳櫻花
先講呢個薑汁豬柳飯，眼見嘅只係洋蔥炒豬柳，唔覺有薑，但食落薑汁味非常濃郁，配合埋醃得入味嘅豬柳及鮮甜嘅洋蔥，味道恰到好處！此乃第一個驚喜！
再試呢個以為係普通嘅日式湯烏冬，原來一啲都唔普通，烏冬係極之彈牙！好食！
再講檜御膳櫻花定食，賣相已經相當不俗，淨係壽司都有十幾款，可以講應有盡有，連我最喜愛嘅海膽壽司都有，仲係好新鮮同好鮮甜！又一驚喜！
除咗款式齊備嘅壽司之外，仲有甜蝦及三文魚刺身！同樣新鮮好食！
連配菜都有驚喜呀！原來係南瓜蓉！南瓜味極之濃郁！正！
唯一係個麵豉湯重手咗，味道偏咸！
但整體以咁嘅價錢，有咁好嘅食物質素同環境，已經相當滿意！一定會再去試試其他不同款式嘅美食！
