Green Waffle Diner (形點) (已結業)

今日同朋友嚟呢個商場影熊本熊之後就諗住食晚飯，由於唔想行出去咁熱所以就係呢個商場睇下有咩啱食。揀咗呢間開放式餐廳，位置非常闊落，仲安排到個卡位畀我哋坐。我就要咗個卡津雞肉薯粒鑊仔朋友就要咗個啤酒脆漿銀鰽魚炸魚薯條朋友個炸魚薯條等左陣就嚟到賣相非常吸引 炸到金黃色嘅魚柳非常大，外皮炸得非常脆口同薄身。入面嘅魚柳同平時食到嘅好唔一樣，口感較厚實唔會食落好霉，魚肉仍然係非常嫩滑，簡單加小小檸檬汁已經好好食。 推介 ！至於薯條亦都係非常惹味，每條薯條都非常飽滿又滋味，一條一條keep住食停唔到！至於我嘅鑊仔賣相當然都係好美觀！有一隻流心水煮蛋喺上面再加埋滿滿嘅芝士同cajun粉 夾埋香口薯仔粒同雞肉仲有青椒洋蔥，口感同味道都好豐富。 份量十足又好食 。食甜品自然就係第二個胃，同朋友揀咗個鮮芒果士多啤梨窩夫配朱古力雪糕。窩夫外皮少少脆入面嘅口感咁軟綿綿又有蛋香，熱辣辣好滿足 。呢度係非常大方，枱面上係有蜜糖膠漿比你自己加，當然我哋就咁配忌廉同埋雪糕已經非常好食。配朱古力雪糕確實係甜溜溜，配返芒果同埋士多啤梨清新一下都係好好嘅配搭！