味千拉麵 (已結業)

好耐都無去味千拉麵食晏，而味千嘅分店亦唔多，於是就揀咗去銅鑼灣皇室堡三樓那間，今次我哋兩個人都叫咗個熊本一人御膳餐，一個係叉燒豬軟骨拉麵，另一個係蒲燒鰻魚飯，嘢飲兩個都揀咗熱嘅柚子蜜。最快嚟到嘅係兩杯柚子蜜，然後大約五分鐘拉麵就到，豬骨湯底依然好有味千嘅獨家味道，香及濃，麵質唔錯，保持以往嘅水準，配菜亦好好食，唯一覺得湯底略鹹。隔咗幾分鐘後，鰻魚飯亦都到埋，見到啲飯感覺落得太多水煮，無咗粒粒嘅感覺，不過食入口時，可能因有鰻魚汁撈咗落啲飯度，就覺得好香好好味啦，而兩杯柚子蜜都沖得啱啱好，唔會太甜，亦唔會覺得太淡。雖然呢間味千細細間，不過人手都好足夠，枱櫈都好乾淨，職員服務態度亦好好，按地段嚟講，價錢尚算合理，不過就唔算抵食。