滿庭芳 國宴 (已結業)

今日住半山既朋友帶我去佢平時食開既中菜館，入面裝潢相當傳統，從牆身、椅子同地板都係木製。另外屏風更只係傳統中菜館先見得到。見到裝潢心諗：死啦，應該好貴。點知轉頭望一望餐牌：嘩！$260二人套餐。套餐包括點心，小食同小菜。尖椒皮蛋既賣相好似孔雀開屏，皮蛋上面放滿青辣椒，辣勁相富凌厲。點心揀左晶瑩蝦餃皇，皮薄而且柔軟，入面既蝦亦彈牙。小菜揀左宮保雞丁同麻婆豆腐，兩者佐飯一流。宮保雞丁既雞肉份量算多，辣辣地之餘亦有微酸，花生仍然脆口。至於麻婆豆腐屬於小辣，豆腐吸收曬辣汁一絕。平時中菜套餐只會送飯，但滿庭芳可以俾客人選擇擔擔麵或蔥油拌麵，麵條都係幼身彈牙，兩者同樣出色，尤其係蔥油拌麵，焦脆、蔥香集於一身。最後仲有湯同甜品，甜品係南瓜西米露。雖然位置較僻，但套餐咁多食物都係$300內，認真抵食。