花月宮

营业中

休息中

好似好耐冇出街打边炉，见今日天气突然间又转返冻，最适合就系打个边炉暖下身。好耐之前嚟过呢度食印象中几好食，𠮶度嘅环境真系几舒服，够晒大，仲好多卡位添。我哋今晚叫咗鸳鸯汤底，一边系沙嗲汤底。个沙嗲一上嚟就已经超级香，入面仲要包咗啲鸭血，好够味，连豉油都唔使点。另一个汤底系桃胶椰子鸡汤，呢个汤底都好足料。系开始打边炉之前仲特登试咗佢啖汤，又真系好甜，而且好香椰奶味。因为鸳鸯锅嘅关系，佢只系跟咗个例牌份量嘅鸡。𠮶啲鸡煮完之后仲好滑添，呢个汤底系几值得嗌嘅。然后我哋叫咗个封门柳，上到嚟个颜色唔系好靓，比较深色。不过原来佢系成晚嘅MVP，因为好香牛味，而且仲好腍添。另外嗌咗个鸳鸯蚌，但系佢就唔系太新鲜，所以味道好一般。之后我哋叫咗个饺子拼盘，但系佢今晚冇晒辣子鸡饺子，就俾咗两款重复嘅凤城饺子，卖相一般。但系每一粒咬开都系有好大只虾，而且啖啖肉好弹牙，真系搞不可以貌相。另外佢哋嘅黑松露饺子就冇虾嘅，但系黑松露味就好香，可以一试。饮品方面，我哋两个人叫咗一支竹蔗茅根，都分到每人两至三杯，甜度啱啱好，感觉上又可以清热气。两个人食咗千零蚊，打边炉嘅话算系咁啦，不过两个女仔嚟讲都够饱嘅。