新金堡餐廳

营业中

休息中

喺灣仔區做完嘢突然想揾下實惠啲嘅西餐，行下行下喺春園街後面隔離就揾到呢間門面好細，要上層先有位嘅港式西餐。平日晚飯時間都唔算多人，雖然樓上座位唔多(大概20-30人)，不過都未必需要等位。餐牌上有十幾廿款set dinner，好多都係扒+飯/意粉/薯菜，連蒜茸包同紅/白湯嘅經典港式西餐combination。蒜茸包+羅宋湯+熱檸茶 ★★★★✰羅宋湯有少少辣好啱我飲，蔬菜都唔少，係好標準嘅味道。香煎豬扒伴焦糖蘋果燒汁配意粉 ($98) ★★★★★兩塊豬扒配少少甜嘅燒汁，仲有一塊juicy嘅罐頭菠蘿，配上落咗少少鹽調味嘅意粉同雜菜，係好符合我預期嘅港式西餐，豬扒表面煎得幾香，而且比較薄所以完全唔覺得韌；燒汁都係好standard茶餐廳嘅味道加少少焦糖香。整體而言，一百蚊上下可以喺灣仔區食到咁嘅水準嘅西餐，確實物有所值。雖然座位唔算寬敞，不過喺樓上有種親密嘅感覺，環境可以接受；店員都大致有禮，所以我會話係同類型餐廳中高性價比嘅選擇。