旮旯 (已搬遷) 新店位置

今日木嘴黎到深水埗覓食，偶而得知呢度有間野賣麥糍，本身我聽到呢個名都黑人問號，肚臍就聽得多，麥糍究竟係乜東東？了解之後，先知道麥糍係指麥提莎糯米糍，聽落又幾有新意幾吸引喎，就即管試下你有咩咁巴閉。包裝靚靚仔仔，間野叫旮旯，文盲如我番屋企查下字典先知道原來係角落咁既意思，至於點發音唔記得左，有邊讀邊當住佢讀日九或者九日或者日日或者九九先啦下。買盒野既同時呢間舖頭好貼心咁附上食用方法添，有誠意，我鐘意。麥糍賣$58 16粒，有黑芝麻、抹茶、雲呢拿揀，本來見到食評話好快賣晒都好擔心，好彩木嘴我平時食野唔洗等位之外，連野食都唔會咁快賣晒。呢日6點幾去到所有味都仲有貨，最後揀左黑芝麻同抹茶。食落口個皮幾煙韌，抹茶味就稍帶抹茶既苦澀味但唔會太苦，夾埋麥提莎既甜味就岩岩好。黑芝麻既話，一開始其實唔係好食到黑芝麻味，係食到後面先愈黎愈濃黑芝麻味。如果要我揀就覺得抹茶好食d。木嘴一向都好支持小店，以小店黎講做得好有誠意，賣既野又有gimmick，買黎送禮又好自己食黎打卡又好，都係一個唔錯既選擇。