公和荳品廠

今朝要喺附近處理啲事情就同老公同仔仔去哩間嘢到食個快早餐充吓飢，點知留咗短短唔知15分鐘都冇嘅時間就可以換嚟極差嘅體驗。

一）收銀女士長期黑口黑面，好聲好氣問佢洗手間喺邊已經好似得罪佢全家咁；
二）廁所環境勁核突，最後我係唔敢去；
三）收銀女士用好差嘅態度同自己伙記講嘢，食客聽到都唔舒服；
四）食物質素差咗好多，連屋企樓下街邊檔都好食過佢；
五）收銀女士對我個唔夠兩歲嘅仔態度極惡劣。雖然係我個仔因為見到門外櫥窗入面有貓咪所以拍咗幾吓，但作為家長已即時告誡同制止，點知個收銀女士（後自稱老闆）突然衝出嚟用極兇狠嘅眼神啤我個仔，係兇狠到我個仔一望到就喊，同佢理論佢仲勁串咁話「咁你想我點呀～唔通要我講「哎呀小朋友唔好拍啦好危險㗎～」咁呀！？」，諷刺嘅係個櫥窗入面放嘅正正係佢哋同幼兒園合作嘅紀念品！

如果連好聲好氣同小朋友講一句嘢都做唔到嘅人，我唔明點樣可以代表間舖同幼兒園合作？為咗做樣懶係良心店舖實質係毫無愛心可言？

講真以前同阿爸嚟食開都唔expect哩間野有咩好服務，啲嘢食差咗好多我都當可以見人見志。但係一諗到佢咁高調將自己同幼兒園合作嘅作品放出嚟，但事實上對幼兒嘅態度其實係極差就真係好虛偽同恐怖。

我決定寫哩段野就係因為覺得哩啲又假又對內外都咁差又難食嘅商家絕對唔值得任何客人嘅一分一毫，比一蚊佢都直頭係助長佢哋嘅惡行。

最後都事後發覺哩度都唔只一次有人話佢差，連對行動不便嘅老人家一樣態度咁差，我更加相信我絕對唔係唯一一個證人。