香港18餐廳 (已結業)

睇咗唔少服務態度差嘅評論，可能因此冇乜期望，還是今日係平日唔多人，唔覺得服務態度特別差。今晚放工入海怡半島，四圍搵食見到呢間香港18，原來係西多士「仲未執系列」耶琳閣旗下，即管入去試伏。一入想坐靠窗邊位置，但枱上還有之前客人留低的紙巾未清理好，邀請侍應嚟清理，果然注重衛生程度一般。叫侍應落單都係叫兩三次先嚟，叫左個 芝士龍蝦汁吉列魚柳撈公仔麵 $52+3，呢個時間唔係咁多新客入嚟，但都等咗二十幾分鐘，催過一次單先嚟。不過食物質素又唔係想像中咁差。公仔麵都算有D彈牙，芝士汁係有啲浠，不過唔知係咪本身應該係咁；個湯都真係幾有龍蝦味，雖然咸咗少少；炸魚柳塊皮好夠脆，魚柳都滑，雖然熱度唔係好熱，又唔似係剛剛炸起，另外就係切開的刀工非常麻麻，有大有細，最大嗰塊比最細嗰塊大成倍，雖然唔影響味到，但畀人好求其嘅感覺。個整體而言如果唔介意環境服務各種有因素，食物質素本身都仲可以，都食得過。