富臨漁港

营业中

休息中

朋友突然問食唔食羊腩煲，就到左富臨試下佢個特價煲。星期五晚七點幾黎到，竟然數埋無十枱客，個市有無咁淡呀…？要點特價煲，條件係要點一個正價菜，合理吖，就先點兩樣野啦。⭐富臨小炒皇呢個都算係近期食過最難食嘅小炒皇，雖然正常有嘅料佢都有，韭菜花、蝦乾、魚乾、魷魚、腰果等，但唔知師傅係冇落調味料定點，食落去淡茂茂好似完全冇炒過咁，仲要上枱係凍嘅，得嗰幾枱客唔使一早炒定喇啩。⭐雙冬羊腩煲個特價羊腩煲就幾有驚喜，細細煲都有五、六件羊腩，入面有馬蹄、支竹同冬菇，但係就冇筍。而取代咗筍嘅居然係粉葛，仲要超大舊，雖然吸咗南乳羊腩汁啲粉葛其實幾好味，但都唔使落咁多粉葛嘅，淨係食葛都飽咗啦。計埋碟花生同茶錢，呢度食咗二百幾蚊，嘢食一般啦，勝在地方大有冷氣，服務就不敢恭維。