地點：旺角洗衣街
菜式：中式點心
餐牌：餃點類，酥點類，生滾粥，小食，中點類，包點類，腸粉類，飲品，蔬菜類，原盅燉湯，甜點類，籠仔蒸飯類。價錢親民。茶位每位$5。落單用QR Code。
酥皇鳳梨巨匠 $18
酥皇鳳梨巨匠真係大大個菠蘿包上枱，好大件，打卡一流。附上沙律菜一條同較剪。剪開發現原來係薄薄麵包皮入面有甜甜地既鳳梨肉係底。加上表面菠蘿皮，味道都幾好唔會太甜。入面空氣感一流，唔會太飽。
上海小籠包 $28
上海小籠包一客三件，夾起湯汁唔會漏出黎。除左頭頂皮有少少厚，其餘位置皮都唔會過厚，入面湯汁不少，加埋醋食味道都唔錯。
晶瑩鮮蝦餃 (4粒) $34
呢度可以選擇叫蝦餃燒賣4粒或者兩粒，價錢除返每粒係一樣，好貼心！蝦餃塊皮厚薄適中，入面餡料爽口，跟辣椒醬食更好味。
原隻蝦燒賣 (4粒) $34
燒賣真係有大大粒蝦係面，面頭再加上蟹籽，下底係啖啖肉爽脆唔肥，仲有冬菇味，皮薄餡靚之表表者。
蜜汁叉燒腸 $28
蜜汁叉燒腸一客兩大條切開六件，每條半透明白色腸粉皮包住唔少叉燒肉同芫荽，上枱時服務員先加豉油。腸粉滑溜，入面叉燒味道都唔錯，餡料夠。
醬皇金錢肚 $28
醬皇金錢肚有4塊，口感係完美爽口彈彈地牙又滑滑地，個汁少少辣，好惹味，唔會太油或者重口味，面頭加上青同紅辣椒。下底居然有少少冬瓜，可降低油膩感。
所有點心都係即叫即整，熱辣辣上枱，質素高，而價錢並唔貴，無加一。環境算乾淨企理，平時午市超旺，一點都可以直入。
1
1
10
28
