牛屋 (已結業)

喺深水埗繁華鬧市嘅另一面，就係比較寧靜嘅住宅小區，其實入面都不乏一啲高質素嘅小店，今日就同朋友嚟到美居中心呢一間比較隱蔽嘅「牛屋」。店舖內充滿日式嘅佈置，佈局都有少少日本小店嘅影子。定食價錢非常相宜，配埋蜆肉麵豉湯及前菜都只係$60上落，定價一啲都唔貴，而且唔需要加一，就更加覺得抵食。首先我特別推介呢度嘅蜆肉麵豉湯，隻蜆肉係超大隻，而且入面有好多豆腐粒，粒粒都好幼滑，麵豉湯鮮而不會過鹹，成碗湯我都覺得好好味。三獸丼包括豬、牛、雞肉。我尤其欣賞佢嘅炸雞，雞肉嫩滑又夠香口。另外嘅紅酒燉牛舌就更加美味，牛舌大大件非常厚身，份量足夠，仲配上紅蘿蔔，淋上醬汁，開胃到可以成碟飯沽清！店內仲見到有壽喜燒套餐同串燒系列，下次有機會試佢嘅晚市的話，一定要試試！