1
真係好隱蔽嘅小店喺正小巷入面，都係朋友介紹去食，間中兩隻狗仔都會係到做狗店長，超乖超可愛！
🌶酸菜魚 $178
★★★★☆
得3個人最後決定叫小份，另外加左多份寛粉！入面本身已經有生魚片、酸菜、萵筍、豆卜、雞脾菇、寛粉。魚片新鮮幾爽滑夠哂入味，夠酸！豆卜份量巨多，勁索汁，唯一係個酸菜已經出哂味冇酸味。雞脾菇先炸再放落去煮，入味又特別。寛粉好夠煙韌，好食！
🌶蒜泥白肉 $48
★★★★☆
擺得好靚一份6大件，雖然有好多蔥蒜鋪面，望落好似好濃重口味，但佢卷埋青瓜，食落唔會太油膩，幾滋味，白肉食落肥瘦適中。
1
🌶涼拌魚皮 $48
★★★★☆
呢個係泡椒味，叫小辣都比一般嘅更香脆，辣得好過癮！魚皮做到好爽脆Ｑ彈，長條形，餸酒真係一流！
🌶酸辣土豆絲 $68
★★★☆☆
大大份，土豆絲炒得夠爽脆，但唔夠酸，另外叫左店員加酸，剛剛好！
🌟總括：自家經營小店，好多幫襯都係老顧客，酸菜魚好唔錯，值得一試。另帶，佢早上係一般早餐店！
