喺土瓜灣呢一區，我都試過有兩間飲茶，覺得中規中矩，但係礙於沒有其他選擇，就只可以接受。
直到有一日唔打唔撞，見到一間門口冇乜特別，而且係不起眼的餐廳，就抱着求其一試的心態入去，點知喜出望外。
佢係一間茶樓嘅形式，小店作業，場內大約有20張枱左右。
Lunch時間，都係食點心，燒味飯，炒野等等。
本身十分之喜愛吃燒味，當然要叫一個叉燒燒腩仔，試一試佢嘅功力。做得真係好！因為第一佢唔係專做燒味嘅舖頭，呢間嘅燒味獨立來講，我比佢7-8分，因為叉燒算香，而且佢肉質都比較淋；燒腩仔都脆，又唔凍。
其實我食過好多間燒味店，專做燒味，都未必比得上佢，有啲直頭係麻麻哋，唔好食添。所以喺度食到呢個Level質素嘅燒味，我覺得好開心。
跟住再叫咗兩個點心，一個係香煎鯪魚肉餅，一個係鮮蝦腐皮卷。
兩個都真心好食。首先第一，係新鮮即刻整，個鯪魚肉餅咬咗啖，啲煙出嚟，而且個皮係好脆好薄，一定唔係重複炸嘅食物。
鮮蝦腐皮卷都係好新鮮，佢嘅腐皮係好脆好薄，但係又唔算好油，用嘅餡料都好新鮮，好好食，口感好豐富。
今餐我食得好開心，亦都發掘左一間好味嘅飲茶地方。但係睇佢現場嘅客流量，其實都幾少，好似大約一半左右。可能因為佢門面真係非常之低調普通，其實經過都唔會發現有呢間野。希望佢可以多啲人幫襯，因為我仲想食好食嘅飲茶，而且用心製作。
