香港仔避風塘 (已結業)

今日下午要到尖沙咀工作，完成工作之後，就喺尖沙咀漢口道附近搵嘢食，雖然話開返關，但係人流其實都唔係多咗好多 ，其中呢一間食店有兩個舖位，一邊係做返去傳統嘅粉麵，另係一邊裝修設計都唔同，用咗中式古典設計嘅枱椅，招牌都寫住避風塘，主力做小菜，嘅睇佢餐牌小菜都唔貴，午市套餐都係大概六十蚊，晚市小菜都有好多係幾十蚊，而且賣相都唔錯，有機會嚟試下。今次因為下午茶時間嚟到，所以就簡簡單單賣咗一個茶餐 ，茶餐入面見到一樣自己好鍾意食嘅嘢 ，就係羅宋湯底配通心粉 ，上面係午餐肉粒同埋牛腩粒，通心粉係一樣好得意嘅美食，佢會將啲湯吸曬入去，一啖食落去，啲湯會爆晒出嚟，完全感受到湯嘅滋味，當然如果味精湯就唔好啦，但係如果配羅宋湯或者啲靚嘅湯底呢，就會好好食啦。至於跟餐嘅火腿奄列同多士就麻麻地啦。