UA戲院小食部 (已結業)

前日下午，收到弟婦來電，告知有免費戲飛睇變形金剛，還包汽水一枝，爆谷一包或熱條一隻。嘩，一毫子也不要付出，就可睇戲食野兼嘆冷氣﹗小妹當然馬上舉手報名啦﹗該場次變形金剛被某銀行包場了，扶手電梯旁放滿了膠樽裝可口可樂，爆谷、熱狗和3D眼鏡。我們排隊魚貫地入場，工作人員則逐一派發食物和眼鏡給我們。焦糖味爆谷握在手上，只帶微溫，不免擔心爆谷早已放淋了。仔細一看，白晢的爆谷被褐色的焦糖團團圍住，在燈光下，綻放出柔弱的閃光。咬下，粒粒香甜而脆口，雖稱不上極度卜卜脆，但算不錯了。焦糖的獨特甜味更叫人百吃不厭，越吃越上癮﹗上層粒粒原整爆谷，惜底層是碎瑣瑣的，且間中有一兩粒未爆開的爆谷米。細佬的熱狗，嘴饞小妹也咬了一口過過口癮。熱狗大大隻的，包夠鬆軟，腸仔皮脆肉汁豐富具嚼勁，唧上蕃茄醬、芥末醬和酸瓜醬後同吃，味道大大提升也。