新記芝士麵 (已結業)

早几年系理工大学读书时期，穷学生想喺尖沙咀食平啲就会去香槟大厦，一系芝士面，一系蕃茄面。不过小妹一直唔多欣赏芝士面，一来圆枱坐得唔舒服，环境旧但无味道，二来真心唔特别好食，三来蕃茄面个蕃茄底真心出色，永远会拣蕃茄而拼弃芝士。近几年发觉，芝士面质素低左好多，小妹已有起码两年无去过。今日想食蕃茄，但蠢左唔知星期日休息。摸门钉又行到好攰，就一试芝士面。哈！唔食由自何，一食就大获，激起小妹打第一篇食评。小妹与男友各点了一个蕃茄鸡翼螺丝粉和终极芝士面，等了又等，足足呆等左三十分钟，咁都算。先讲男友碗面，话「终极」，有几「终极」咁呢？其实就系四块猪颈肉，四至五块红肠，加只煎蛋，完。猪颈肉，话系招牌之作，但硬而干，唔通系新制品---猪颈肉干？红肠同煎蛋正常野，芝士味呢？有但唔浓，或者应该话无以前咁浓，吸引之处都无左，其他野食又普通到唔普通，咁点呀？重点在于我碗蕃茄面，蕃茄粒几粒，再用叉沾少少红色汁一试，下？茄汁黎既？即系煮熟螺丝粉再加茄汁呀！食到我无言。两碗加埋$94。其实是但揾间茶餐厅都OK过佢，小妹同男友都表示以后唔会再帮衬～