囍囍小廚

营业中

休息中

屋企人生日，又唔想佢哋行咁遠。建議佢哋過嚟呢度食晚飯，呢餐就我作東。呢間餐廳前身已經試過下午茶好好食，不過之前搬咗舖試過佢啲下午茶有少少走樣，咁唔可以以偏概全，所以今次就試埋去晚飯。款式超多，有少少眼花撩亂。表弟表妹喺度就叫啲香口嘢。黃金鮮魷相當口肉，真係估佢唔到，竟然食到魷魚嘅鮮味。個薯仔牛柳粒都唔韌，又入味。另外個豬頸肉用冬陰公醬嚟炒，同埋個雞煲用參巴醬嚟撈勻，風味幾特別出邊啲小菜館又真係少呢個做法。忍唔住潷咗啲雞煲汁，第二日攞嚟帶飯食。另外當中最出色就係個欖角骨，個汁㗎味道較得啱啱好，同埋包住啲骨一啲都唔乾，外面啲餐廳都未必食到呢個效果。唯一有少少失望係個炒飯，師傅好似漏咗落鹽。同埋屋企人生日要食伊麵，咁就嗌咗個海蝦伊麵，啲蝦肉真係爽，但係就冇蝦味。另外個豆苗啲金菇就比瑤柱多左少少。不過整體用餐都係唔錯嘅都有驚喜。