米線二雲南過橋米線 (已結業)

中午時候去到荃灣絕對唔擔心冇嘢好食。荃灣係一個美食嘅天堂，你諗到想食乜都一定搵得到。今日冇乜胃口，諗住食吓啲濕濕地嘅嘢，就決定咗去食米線。經過呢間米線舖頭已經傳出陣陣嘅香味，中午時間都幾多人。睇到Menu已經花多眼亂，好多野都好想食。首先揀左米線先，小鍋米線已經有一定既配料如果唔要辣記住要走肉碎呀。我呢就全部都要既~今次叫左炸醬，腩肉同菜肉餃子酸辣湯底。炸醬香辣，腩肉半肥瘦超級香口，而餃子大大隻又唔會煮得過龍而爛晒。重點黎啦，呢碗米線真係好大碗，足足夠晒2個人食，而且米線係非常彈牙吸晒湯入面既酸辣味道好正。食唔停口。咁當然一場黎到梗係叫啲小食配米線啦，我最鍾意涼拌青瓜之後諗諗吓又想食埋豬頸肉，就一齊叫埋啦。涼拌青瓜係清新口味，唔係死喊死酸咁。越食越開胃。而豬頸肉係好脆口同多汁。最特別既係今日試左一款叫左螺旋藻，酸酸甜甜幾好食，好似涼拌海帶咁樣。兩個人一碗麵兩個小食都已經非常之足夠。好滿足既一餐。