和花亭壽司 (已結業)

本来话左半年内都唔会再黎，但系冇办法，爱人要食寿司，观塘选择有限，惟有自打嘴巴又黎食过。半价时段入去，星期六排左大概一个钟头先有位。今次终于记得影相，讲下一Ｄ我未讲过的食物评价。17蚊一碟一件特大灸昆布鲭鱼腩寿司，肉质口感比13蚊一碟两件昆布鲭鱼寿司爽，但不见得特别好味，只系块鱼肉长少少，个人觉得唔算抵食。10蚊一碟两件玉子寿司，做得比好多寿司店有诚意，其它店只会就咁整熟就算，反而和花亭系用镬煎熟再一层层折埋而成的（去过上水分店的食家就有机会见到师傅即场煎蛋）。而且佢有一大特色，常见的玉子寿司系在寿司饭上面加块蛋再卷紫菜，而和花亭系在蛋入面塞少少饭再卷紫菜，所以系蛋多饭少，而且蛋味甜甜地，我每次去都有叫。35蚊一碟两件海胆寿司，外观睇落新鲜，但系冇咩鲜味。曾经试过一次有海胆屎未挑干净，食落口会有一大朕异味。18蚊一件三文鱼鱼子手卷，之前我写过佢地可能转左供应商或者货种，所以水准下降。唔知和花亭方面系咪有人会上OPENRICE睇食评，所以我今次再试，竟然食得番半年前的三文鱼子。如果系真的话，呢个真系抵赞！