餃里 (蕪湖居)

营业中

休息中

有一日行過紅磡蕪湖居肚餓，見到呢間店個名幾得意，叫餃里，搞到我都想餃餃佢。顧名思義，餐廳主打餃子，無論湯餃定煎餃我都好鍾意食，所以就試吓。餐廳店面唔算大，但係麻雀雖小五臟俱全，叫咗一份紫菜餃湯麵，價錢非常公道，仲可以套餐價加菜同埋豆漿，真係相當抵食～餃子最緊要就係個餡，咬開紫菜餃裏面果然對板，滿滿嘅紫菜配襯住啖啖肉，有咬口得來又夠飽肚。個湯都做得唔錯，餃子吸收咗湯嘅精華更加出色，麵條本身都幾彈牙，加埋粟米等等配料，食完一個已經有飽肚感～朋友點咗份泡菜餃子，辣辣地得來又幾開胃，我都夾咗一隻嚟試吓，各有特色，不過個人比較喜歡紫菜餃子多啲。加埋冰凍豆漿同埋菜，營養均衡又夠飽。推介大家自己或者想同朋友食餐便飯又唔想太高消費，不妨考慮一下，價錢相宜地點方便就腳，而且餃子都整得幾好食～