龍門客棧蛇羹專門店 (已結業)

今日見天氣稍涼就去咗大埔龍門客棧試一試個蛇宴，畢竟喺香港食蛇嘅地方已經越來越少，見一有新鋪開張特登嚟試下。我哋燉湯點咗川芎白芷燉蛇碌， 入面超多蛇碌，同埋有其他嘅藥材，川芎白芷當然亦唔少得，個湯好濃，飲完即刻成個身都暖笠笠，而且係完全冇落味精連鹽都冇落，師傅另外畀咗 2樽鹽同胡椒我哋，若有需要可以落少少，但係真係夠曬味。另外我哋叫咗滋補蛇羹，入面超多蛇肉，師傅話入面8成係蛇肉，溝咗兩成雞絲，完全冇豬肉喺入面，而且亦都有好多配料，又係食到唔停得口，而且入面每一啖都起碼有兩三條蛇肉，同樣師傅冇落鹽同味精，已經好夠味，另外佢會有檸檬草提供，師父亦建議頭兩啖試一試唔落檸檬草，跟住食先再落檸檬草會食到個層次嘅分別，真係好專業。糯米飯亦好甘香，加埋少少臘腸一樣係食到好飽好滿足。最後師傅炒咗一碟椒鹽蒜蓉蛇碌畀我哋試，又係超多蛇肉同埋好惹味，而呢碟餸係餐牌上面冇嘅，因為師傅佢做埋私房菜，所以下次黎食飯嘅朋友除咗蛇宴外其他海鮮或者晚飯提供亦有私房菜，亦可以打電話去叫師傅預訂某種燉湯及菜式，呢種服務真係香港好少有，好貼心一定要支持大埔非連鎖小店！