📍天水圍天靖街3號天盛商場1樓L128號舖
十月底除咗係萬聖節，亦係老爸生日月，今年約好老爸三日，分別同唔同parties慶祝生日。其中一餐係我同老爸撐枱腳，去天水圍茜廊食嘅晚餐，撞正月尾有萬聖節套餐，決定每樣都叫啲同大家分享。
住大西北咁多年，茜廊就存在咁多年，每次去完會所玩之後，諗唔到食咩就總係會走咗去茜廊食，都算係童年回憶。店舖闊落、上菜快、餐點有共同回憶等，都係茜廊嘅特色，令喜歡傳統舊式西餐嘅老爸好滿意！
[價錢 Price]
💰$48
手指魚柳配薯條 🍟
呢個價錢其實幾抵食，手指魚柳炸得超級香脆，而且唔油，咬落外層鬆脆，內裏嘅魚肉仍然保持嫩滑，唔乾。粗薯條都炸得唔錯，熱辣辣、外脆內軟，再配少少茄汁或者他他醬，經已好滿足。
[價錢 Price]
💰$98
精靈放大鏡 🔍
萬聖節特別套餐其中一款係田螺南瓜薄餅，以鵪鶉蛋做眼睛、南瓜片做嘴巴、沙律做蜘蛛網，賣相頗有創意。
Pizza係薄底款，邊位脆口，茄醬同芝士相輔相成，搭配鹹香嘅田螺，味道出奇地夾，經典中帶點創新，應節食都幾特別。
套餐亦包埋「吸血鬼魔法」紅菜頭忌廉湯，睇落紅噹噹，好有氣氛。忌廉湯甜中帶微微菜香，即使我唔鍾意食紅菜頭都能接受。
飲品方面就有「古怪精靈朱古力特飲」，即係朱古力飲品，除咗有塊Oreo 點綴之外，仲有一大球朱古力雪糕，非常驚喜！佢哋仲特意用棉花糖同硬糖扮成眼球，夠晒古怪精靈。
[價錢 Price]
💰$68
香濃茄汁焗豬扒飯 🥫
我哋亦叫咗個港式經典茄汁焗豬，飯面舖滿芝士同茄汁，夾雜蘑菇、西芹、紅蘿蔔等雜菜，焗到香噴噴，一啲都唔hea。豬扒厚身，肉質唔柴，茄汁酸甜度調得啱啱好，炒飯亦有鑊氣，大大份，CP值好高！
[價錢 Price]
💰$108
香煎羊髀扒 🐑
鐵板上嘅羊髀扒煎得好靚，表面焦香，切開入面仲有少少粉紅色，肉質嫩滑，無咩羶味。相比羊架，羊髀無咁多骨，啖啖肉，食起上嚟更方便，配埋少少汁同雜菜，味道平衡。以一百蚊鬆啲嘅價位嚟講，絕對值回票價。
[價錢 Price]
💰$29
蜂蜜合桃蛋糕 🍰
甜品時間，為老爸呈上第一件生日蛋糕！呢個蜂蜜合桃蛋糕出乎意料地好食。蛋糕鬆軟唔乾，合桃粒香口，蜂蜜味香而不膩，如果配埋杯熱茶就perfect啦！
