Black Pearl France 法國黑珍珠生蠔，開得好靚好有技巧，唔係唔識扮識老吹亂講架喎﹗蠔邊完整無缺，唔係死撬難撬用死力，沒有一粒蠔殼，仍然保有海水蠔汁，並無用水亂沖一通，出場靚靚仔仔唔係甩皮甩骨，非讚不可﹗蠔肉肥美飽滿，即叫即開新鮮絕頂，加幾滴鮮檸提味，入口爽滑清淡帶著海水有陣陣蠔鮮餘韻﹗好想食多幾隻，但今天已經沽清了。
葡式燒乳豬，不肥膩無痴肥無肥膏一舊舊，薄薄白色脂肪緊隨著咸香彈牙瘦肉，回味無窮。嚥韌的燒豬皮放了段時間已完全不脆，幸好味道美妙吸引。
三文魚子海膽忌廉蘑菇意粉，刺身搭翡翠苗感覺似十足日式洋食意粉。肥美厚厚冰涼加拿大海膽，三文魚子圓轆轆咸鮮甜美脆卜卜。涼浸浸三文魚子海膽，讓熱烘烘意粉盛著享用，冰火溫差非常有趣特別，香濃厚厚的忌廉汁捲著意粉大啖大啖地塞，滿足暢快食到舔舔脷。
