澕記車仔麵 (已結業)

住喺依度附近真係唔怕餓死，成條街都大把野食。本來諗住去食牛肚麵，見到依間車仔麵好似又轉左名，但裝修又冇變到。我估應該都係競爭大，做唔掂，但估唔到咁快玩完🤷‍♀️（上一手我都幫襯過一次嫁）見到32元有三餸包野飲，都平過其他嘅，就試下咩料喇~詢問之下😃外賣仲有得平2元，當然諗都唔洗諗喇!雖然係中午時間，但係都只得兩三個人堂食。我就揀左牛根，牛肚，豬腸，麵底揀左幼麵。飲料有罐裝及枝裝可樂，唔算有多款揀（仲有雪碧忌廉）。枱面有辣菜脯，葱，咖哩醬......比客人自己加料。三餸的份量都算多，每樣都至少有6件我覺得豬腸最好食，唔算太肥，又冇羶味。牛肚就麻麻地，可能係關腩汁調味掛。要求唔高的話，都合格，可以一試支持下嘅!