粥館 (已結業)

　　午市兩點半左右去到，全場爆滿，可見呢度真係好多人幫襯。最吸引人係呢度有即製腸粉，叫外賣企o係度睇住佢整，特別覺得新鮮。店員非常有禮，個粥o既料俾你左轉右轉都唔會表現到好似浪費佢時間咁，加分。　　外賣左瘦肉艇仔粥同蝦米腸。明明入過外賣盒，但腸粉D蝦米竟然仲係脆脆地o既，難得。腸粉外觀色澤新鮮，食落爽口，唯獨唔夠堂記咁嫩，然而亦不失為一個選擇，相信堂記未開都可以幫襯佢，而且佢出菜絕絕快過堂記。就係多油呢樣野真係要改改，腸粉係得又使乜落咁多油呢？　　艇仔粥，粥底比堂記好好多... 初初仲以為自己叫左海鮮粥，裡面有魚片同埋... 唔係掛，好似係鮮魷？！睇返資料我先知原本o既艇仔粥以河鮮煮粥，原本就應該有魚片... 咁講法，其他舖頭算唔算減左我料啊？（笑）好欣賞呢度D粥o既低鹽，事實上腸粉即使有落豉油都唔算鹹，唔知係巧合定係佢真係低鹽粥店？　　睇返餐牌，呢度有魚飯餐又有盅頭飯，部份仲有優惠時段，可以揀o既野真係好多。遺憾我已經無乜機會再黎呢區，只能送上好評一個。