雙喜臨雲南米線 (已結業)

西貢終於有米線啦，個門面好似譚仔咁，諗住過去試吓啦，但點知係好難食好難食，係難食到完全食唔落。叫咗碗酸辣湯底，個酸辣一嚟到係黃咁咁，超級咸，食完都驚會有腎病。仲要唔知點解個味道勁奇怪，有菠蘿汁咁樣，又咸又甜，食多幾啖都想嘔。啲韭菜有浸草青味，腐皮好似濕紙巾。雞肉牛肉又無味，完全唔知食咗啲乜嘢落肚，好驚嚇。杯凍奶茶仲恐怖，成杯奶水咁。淡到唔知飲緊啲乜，大佬呀你唔識沖咪唔好賣嘢飲囉，收人$15一杯，唔係求其到咁下嘛？！個蒜泥白肉仲經典，成個暗黑料理咁款。完全係辣椒油同埋生蒜頭就咁放上一堆白烚豬肉上面，真係唔識煮飯都整到。完全唔明點解會有人幫襯呢間舖，hea到咁，十級難食。難食都算啦，夏天喺入邊食好似焗桑拿咁。佢哋間鋪勁細又開大道門走晒啲冷氣，一入去坐低飲住凍嘢未食嘢都可以全程流晒汗，慳皮到冷氣都唔開大啲。題外話，煮米線見到係一個女人，唔知係咪老闆娘。臨走嘅時候見到有個男人返嚟煮返，唔知係唔係個女人唔識煮定點，總之呢餐飯極度恐怖，食咗兩啖就冇食。